ಫ್ಯಾಟ್ ಕರಗಿದಾಗ ಎಲ್ಲಿಗೆ ಹೋಗುತ್ತದೆ? ಬೊಜ್ಜಿನ ಬಗ್ಗೆ ನಿಮಗೆ ಗೊತ್ತಿಲ್ಲದ ಆಘಾತಕಾರಿ ವೈಜ್ಞಾನಿಕ ಸತ್ಯಗಳು

ಬೊಜ್ಜು ಎಂಬ ಭಯ

ಬೊಜ್ಜು ಅಥವಾ ಫ್ಯಾಟ್ ಎಂಬ ಪದ ಕೇಳಿದ ತಕ್ಷಣ ನಮಗೆಲ್ಲರಿಗೂ ಒಂದು ರೀತಿಯ ಆತಂಕ ಶುರುವಾಗುತ್ತದೆ ಅಲ್ಲವೇ? ಇದಕ್ಕೆ ಕಾರಣ ಇಂದಿನ ಫಿಟ್‌ನೆಸ್ ಇಂಡಸ್ಟ್ರಿ ನಮ್ಮ ತಲೆಯಲ್ಲಿ ಆ ಮಟ್ಟಿಗೆ ಭಯವನ್ನು ಹುಟ್ಟಿಸಿಬಿಟ್ಟಿದೆ. ದೇಹದಲ್ಲಿರುವ ಪ್ರತಿಯೊಂದು ಗ್ರಾಂ ಫ್ಯಾಟ್ ಅನ್ನೂ ಕರಗಿಸಲೇಬೇಕು ಎಂದು, ಫ್ಯಾಟ್ ಅನ್ನು ಮನುಷ್ಯನ ಅತಿ ದೊಡ್ಡ ಶತ್ರು ಎಂದೇ ಬಿಂಬಿಸಲಾಗುತ್ತಿದೆ. ಬಗೆಬಗೆಯ ಫ್ಯಾಟ್ ಬರ್ನರ್ ಪೌಡರ್‌ಗಳು, ಡಿಟಾಕ್ಸ್ ಡ್ರಿಂಕ್‌ಗಳು, ಸ್ವೆಟ್ ಬೆಲ್ಟ್‌ಗಳು – ಇವೆಲ್ಲವನ್ನೂ ಮಾರಲಾಗುತ್ತಿದೆ. ಜನರು ಇವನ್ನೆಲ್ಲ ಖರೀದಿಸಿ, ಹಣ ಕೊಟ್ಟು ದೇಹದ ಮೇಲೆ ಪ್ರಯೋಗಿಸಿಕೊಳ್ಳುತ್ತಿದ್ದಾರೆ. ಅಲ್ಲಿ ದೊಡ್ಡ ಸಂಪಾದನೆ ನಡೆಯುತ್ತಿದೆ ಈ ಕಂಪನಿಗಳಿಗೆ.

ಇದರ ಪರಿಣಾಮ – ಇಂದು ಜಾಗತಿಕ ತೂಕ ಇಳಿಸುವ ಮಾರುಕಟ್ಟೆ (Weight Loss Market) ಬರೋಬ್ಬರಿ 296 ಬಿಲಿಯನ್ ಡಾಲರ್‌ಗಳಿಗೆ ತಲುಪಿದೆ. ಭಾರತದಲ್ಲಿ ಈ ಮಾರುಕಟ್ಟೆ 27 ಬಿಲಿಯನ್ ಡಾಲರ್‌ಗಳ ಗಡಿ ದಾಟುತ್ತಿದೆ. ಅಂದರೆ ತೂಕ ಇಳಿಸುವುದು ಇನ್ನು ಕೇವಲ ಆರೋಗ್ಯದ ವಿಷಯವಾಗಿ ಉಳಿದಿಲ್ಲ, ಬದಲಿಗೆ ಇದೊಂದು ದೊಡ್ಡ ವ್ಯಾಪಾರವಾಗಿ ಬಿಟ್ಟಿದೆ.

ಆದರೆ ನಿಮಗೊಂದು ಸತ್ಯ ಗೊತ್ತಾ? ನಮ್ಮ ದೇಹದಲ್ಲಿ ಫ್ಯಾಟ್ ಎಂಬುದು ಇಲ್ಲದೆ ಹೋದರೆ ಮನುಷ್ಯ ಬದುಕಲು ಸಾಧ್ಯವೇ ಇಲ್ಲ. ಹೌದು, ನೀವು ಕೇಳಿಸಿಕೊಳ್ಳುತ್ತಿರುವುದು ಸತ್ಯ. ಫ್ಯಾಟ್ ಇಲ್ಲದೆ ಮೆದುಳು ಕೆಲಸ ಮಾಡುವುದಿಲ್ಲ. ಹಾರ್ಮೋನ್‌ಗಳು ಉತ್ಪತ್ತಿಯಾಗುವುದಿಲ್ಲ. ನಿಮ್ಮ ಹೃದಯ, ಲಿವರ್ ಹೇಗೆ ಒಂದು ಅಂಗವೋ, ಫ್ಯಾಟ್ ಕೂಡ ದೇಹದಲ್ಲಿ ಸಕ್ರಿಯವಾಗಿ ಕೆಲಸ ಮಾಡುವ ಒಂದು ಪ್ರಮುಖ ಅಂಶ.

ಹಾಗಿದ್ದರೆ ಈ ಫ್ಯಾಟ್ ಖಳನಾಯಕ (ವಿಲನ್) ಆಗುವುದು ಯಾವಾಗ? ಫ್ಯಾಟ್ ಕೆಟ್ಟದಾಗುವುದು ಯಾವಾಗ? ಎಷ್ಟು ಪ್ರಮಾಣದ ಫ್ಯಾಟ್ ಸರಿ? ಉಳಿದಿದ್ದನ್ನು ಕರಗಿಸುವುದು ಹೇಗೆ? ಈ ಎಲ್ಲಾ ಪ್ರಶ್ನೆಗಳಿಗೆ ಈ ಲೇಖನದ ಮೂಲಕ ವೈಜ್ಞಾನಿಕವಾಗಿ ಉತ್ತರ ಕಂಡುಕೊಳ್ಳೋಣ.

ಫ್ಯಾಟ್ ಎಂಬುದು ಒಂದು ಜೀವಂತ ಅಂಗ

ಫ್ಯಾಟ್ ಅಂದರೆ ಅದೊಂದು ನಿರ್ಜೀವ ಭಾರ (dead weight) ಅಥವಾ ಸುಮ್ಮನೆ ಅಂಟಿಕೊಂಡಿರುವ ಚರ್ಬಿಯ ಒಂದು ಗುಚ್ಛ, ಒಂದು ರಾಶಿ ಎಂದು ನಾವು ಅಂದುಕೊಳ್ಳುತ್ತೇವೆ. ಆದರೆ ವೈದ್ಯಕೀಯ ವಿಜ್ಞಾನದ ಪ್ರಕಾರ ಅದೊಂದು ಜೀವಂತ ಅಂಗ – ಎಂಡೋಕ್ರೈನ್ ಆರ್ಗನ್. ವೈಜ್ಞಾನಿಕವಾಗಿ ಇದನ್ನು “ಅಡಿಪೋಸ್ ಟಿಶ್ಯೂ” ಎಂದು ಕರೆಯುತ್ತಾರೆ. ಇದೊಂದು ರೀತಿ ನಮ್ಮ ದೇಹದ ತುರ್ತು ಬ್ಯಾಟರಿ (emergency battery) ಇದ್ದಂತೆ.

ಲಕ್ಷಾಂತರ ವರ್ಷಗಳ ಹಿಂದೆ ಆದಿಮಾನವರ ಕಾಲದಲ್ಲಿ ನಮಗೆ ಇಂದಿನ ಹಾಗೆ ಸ್ವಿಗ್ಗಿ, ಜೊಮ್ಯಾಟೊ ಇರಲಿಲ್ಲ. ಬೇಕಾದಾಗ ಬೇಕಾಗಿದ್ದನ್ನು ತಂದುಕೊಟ್ಟು ಹೋಗುವ ವ್ಯವಸ್ಥೆ ಇರಲಿಲ್ಲ. ತಿನ್ನಲು ಬೇಟೆಯಾಡಿದರೆ ಮಾತ್ರ ಆಹಾರ. ಕಾಡಿನಲ್ಲಿ ಹಣ್ಣುಹಂಪಲು ಸಿಗಬೇಕು, ಇಲ್ಲದಿದ್ದರೆ ಬೇಟೆಯಾಡಿ ಹುಡುಕಿಕೊಂಡು ಹೋಗಬೇಕಾಗಿತ್ತು. ಸಿಗದಿದ್ದರೆ ದಿನಗಟ್ಟಲೆ ಉಪವಾಸ. ಹೀಗಾಗಿ ನಮ್ಮ ದೇಹ ಸಿಕ್ಕಾಗ ತಿಂದ ಆಹಾರವನ್ನು ಫ್ಯಾಟ್ ರೂಪದಲ್ಲಿ ಶೇಖರಣೆ ಮಾಡಿ ಇಟ್ಟುಕೊಳ್ಳುವ ತಂತ್ರವನ್ನು ಕಲಿತುಕೊಂಡಿತು. ಆಹಾರ ಸಿಗದಿದ್ದಾಗ ಇದೇ ಶೇಖರಣೆಯಾದ ಫ್ಯಾಟ್ ಅನ್ನು ಕರಗಿಸಿ ದೇಹಕ್ಕೆ ಶಕ್ತಿ ಕೊಡುತ್ತಿತ್ತು.

ಆದರೆ ಈಗ ಏನಾಗಿದೆ ಎಂದರೆ – ನಮಗೆ ಆಹಾರದ ಕೊರತೆ ಇಲ್ಲ, ಬದಲಿಗೆ ಹೆಚ್ಚಾಗಿಬಿಟ್ಟಿದೆ. ನಮ್ಮ ದೇಹದ ಹಳೆಯ ವ್ಯವಸ್ಥೆ ಮಾತ್ರ ಹಾಗೆಯೇ ಉಳಿದುಕೊಂಡಿದೆ. ನಾವು ತಿನ್ನುವ ಹೆಚ್ಚುವರಿ ಕ್ಯಾಲೋರಿಗಳೆಲ್ಲವೂ “ಮುಂದೊಂದು ದಿನ ಉಪವಾಸ ಬಂದರೆ ಬೇಕಾಗುತ್ತದೆ” ಎಂದುಕೊಂಡು, ನಮ್ಮ ದೇಹ ಫ್ಯಾಟ್ ರೂಪದಲ್ಲಿ ಕೂಡಿಡುತ್ತಾ ಹೋಗುತ್ತಿದೆ. ಆದರೆ ಆ ತುರ್ತು ಪರಿಸ್ಥಿತಿಯೇ ಬರುತ್ತಿಲ್ಲ, ಫ್ಯಾಟ್ ಕರಗುತ್ತಲೂ ಇಲ್ಲ. ಆಹಾರದ ಕೊರತೆ ಆಗದೆ ಕರಗುವುದೂ ಇಲ್ಲ, ಅದು ಹಾಗೆಯೇ ಉಳಿದುಕೊಳ್ಳುತ್ತಲೇ ಇರುತ್ತದೆ.

ಇದರಿಂದ ನಿಮಗೊಂದು ವಿಷಯ ಸ್ಪಷ್ಟವಾಗಿ ಅರ್ಥವಾಯಿತು – ಫ್ಯಾಟ್ ಎಂಬುದು ಕೇವಲ ತುರ್ತು ಬ್ಯಾಟರಿ ಮಾತ್ರ ಅಲ್ಲ, ಅದೊಂದು ಜೀವಂತ ಅಂಗ. ನಮ್ಮ ದೇಹದಲ್ಲಿ ಶೂನ್ಯ ಶೇಕಡಾ ಫ್ಯಾಟ್ ಇದ್ದರೆ ನಾವು ಬದುಕಲು ಸಾಧ್ಯವೇ ಇಲ್ಲ. ಸಹಜವಾಗಿ ಕಾರ್ಯನಿರ್ವಹಿಸಲು, ಹಾರ್ಮೋನ್‌ಗಳು ಸಮತೋಲಿತವಾಗಿ ಇರಲು, ವಿಟಮಿನ್ ಎ, ಡಿ ಮತ್ತು ಇ ಯನ್ನು ಹೀರಿಕೊಳ್ಳಲು ನಮ್ಮ ದೇಹಕ್ಕೆ ಫ್ಯಾಟ್ ಬೇಕೇಬೇಕು.

ಫ್ಯಾಟ್ ಒಂದು ಮೆಸೆಂಜರ್ ಕೂಡ ಹೌದು

ಫ್ಯಾಟ್ ಎಂಬುದು ನಮ್ಮ ದೇಹದ ವಿವಿಧ ಭಾಗಗಳಿಗೆ ಸಂಕೇತಗಳನ್ನು ಕಳುಹಿಸುವ ಮೆಸೆಂಜರ್ ಕೂಡ ಹೌದು. ಇದು ಲೆಪ್ಟಿನ್ ಮತ್ತು ಅಡಿಪೋನೆಕ್ಟಿನ್‌ನಂತಹ ಪ್ರಮುಖ ಹಾರ್ಮೋನ್‌ಗಳನ್ನು ಬಿಡುಗಡೆ ಮಾಡುತ್ತದೆ. ಉದಾಹರಣೆಗೆ, ಈ ಲೆಪ್ಟಿನ್ ಹಾರ್ಮೋನ್ ನಮ್ಮ ಮೆದುಳಿಗೆ “ಹೊಟ್ಟೆ ತುಂಬಿದೆ, ತಿನ್ನುವುದನ್ನು ನಿಲ್ಲಿಸು” ಎಂಬ ಸಂಕೇತ ಕೊಡುತ್ತದೆ. ನಾವು ಅತಿಯಾಗಿ ಜಂಕ್ ಫುಡ್ ತಿಂದಾಗ ಈ ಸಂಪರ್ಕ ಕಡಿತಗೊಳ್ಳುತ್ತದೆ. ಅದನ್ನು “ಲೆಪ್ಟಿನ್ ರೆಸಿಸ್ಟೆನ್ಸ್” ಎಂದು ಕರೆಯುತ್ತಾರೆ. ಆಗ ನಮ್ಮ ಹೊಟ್ಟೆ ತುಂಬಿದ್ದರೂ ಸಹ ಮೆದುಳಿಗೆ ಆ ಸಂದೇಶ ಹೋಗುವುದಿಲ್ಲ, ನಾವು ಮಿತಿಮೀರಿ ತಿನ್ನಲು ಆರಂಭಿಸುತ್ತೇವೆ.

ಹಾಗಿದ್ದರೆ ಎಷ್ಟು ಫ್ಯಾಟ್ ಇದ್ದರೆ ಒಳ್ಳೆಯದು, ಎಷ್ಟಿದ್ದರೆ ಅಪಾಯಕಾರಿ, ಅದರಲ್ಲೂ ಯಾವ ಫ್ಯಾಟ್ ಒಳ್ಳೆಯದು, ಯಾವುದು ಅಪಾಯಕಾರಿ ಎಂಬುದನ್ನು ಈಗ ವಿವರವಾಗಿ ಅರ್ಥ ಮಾಡಿಕೊಳ್ಳೋಣ.

ಫ್ಯಾಟ್‌ನ ಎರಡು ವಿಧಗಳು: ವೈಟ್ ಫ್ಯಾಟ್ ಮತ್ತು ಬ್ರೌನ್ ಫ್ಯಾಟ್

ಫ್ಯಾಟ್‌ನಲ್ಲಿ ಮುಖ್ಯವಾಗಿ ಎರಡು ಬಣ್ಣದ ವಿಧಗಳಿವೆ.

ವೈಟ್ ಫ್ಯಾಟ್ (ಬಿಳಿ ಬೊಜ್ಜು)

ಮೊದಲನೆಯದು ವೈಟ್ ಫ್ಯಾಟ್ ಅಂದರೆ ಬಿಳಿ ಬೊಜ್ಜು. ಇದರ ಕೆಲಸ ನಾವು ತಿಂದ ಹೆಚ್ಚುವರಿ ಕ್ಯಾಲೋರಿಗಳನ್ನು ತನ್ನೊಳಗೆ ತುಂಬಿಟ್ಟುಕೊಳ್ಳುವುದು. ನಮ್ಮ ದೇಹ ದಪ್ಪ ಕಾಣುವುದಕ್ಕೆ, ಹೊಟ್ಟೆ ಸುತ್ತ ಟೈರ್‌ನಂತೆ ಬೊಜ್ಜು ಬೆಳೆಯುವುದಕ್ಕೆ ಇದೇ ಕಾರಣ.

ಬ್ರೌನ್ ಫ್ಯಾಟ್ (ಕಂದು ಬೊಜ್ಜು)

ಎರಡನೆಯದು ಬ್ರೌನ್ ಫ್ಯಾಟ್ ಅಂದರೆ ಕಂದು ಬಣ್ಣದ ಬೊಜ್ಜು. ಇದು ಅಕ್ಷರಶಃ ಒಂದು ಮ್ಯಾಜಿಕ್ ಫ್ಯಾಟ್. ಇದು ಸುಮ್ಮನೆ ಬಂದು ಕೂರುವುದಿಲ್ಲ, ಬದಲಿಗೆ ಕ್ಯಾಲೋರಿಗಳನ್ನು ಸುಟ್ಟು ನಮ್ಮ ದೇಹಕ್ಕೆ ಉಷ್ಣಾಂಶ ಕೊಡುತ್ತದೆ. ಜೊತೆಗೆ ಗ್ಲುಕೋಸ್ ಮತ್ತು ಇನ್ಸುಲಿನ್ ಅನ್ನು ನಿಯಂತ್ರಿಸುತ್ತದೆ. ಅಂದರೆ ಇದೊಂದು ರೀತಿ ನಮ್ಮ ದೇಹದ ಒಳಗಿರುವ ನ್ಯಾಚುರಲ್ ಹೀಟರ್ ಇದ್ದಂತೆ.

ಮಕ್ಕಳು ಹುಟ್ಟಿದಾಗ ಅವರ ದೇಹದಲ್ಲಿ ಈ ಬ್ರೌನ್ ಫ್ಯಾಟ್ ಜಾಸ್ತಿ ಇರುತ್ತದೆ, ಆದರೆ ವಯಸ್ಸಾಗುತ್ತಾ ಇದು ಕಡಿಮೆಯಾಗುತ್ತಾ ಹೋಗುತ್ತದೆ. ಹೊಸ ಸಂಶೋಧನೆಗಳ ಪ್ರಕಾರ, ನಾವು ಚಳಿಯಲ್ಲಿ ಹೆಚ್ಚು ಒಡ್ಡಿಕೊಂಡರೆ ಈ ಬಿಳಿ ಬೊಜ್ಜು ಕಂದು ಬೊಜ್ಜಾಗಿ ಪರಿವರ್ತನೆಗೊಳ್ಳುವ ಪ್ರಕ್ರಿಯೆಯೂ ನಡೆಯುತ್ತದೆ.

ಫ್ಯಾಟ್ ಎಲ್ಲಿ ಸಂಗ್ರಹವಾಗಿದೆ ಎಂಬುದೇ ಮುಖ್ಯ

ಆದರೆ ಫ್ಯಾಟ್ ಯಾವ ಬಣ್ಣದ್ದು ಎಂಬುದಕ್ಕಿಂತ, ಅದು ದೇಹದಲ್ಲಿ ಎಲ್ಲಿದೆ ಎಂಬುದು ಬಹಳ ಮುಖ್ಯ. ಇಲ್ಲಿ ಇರುವುದೇ ಪ್ರಮುಖ ವಿಚಾರ.

ಸಬ್‌ಕ್ಯುಟೇನಿಯಸ್ ಫ್ಯಾಟ್

ನಮ್ಮ ಚರ್ಮದ ಅಡಿಯಲ್ಲಿರುವ ಫ್ಯಾಟ್ ಅನ್ನು “ಸಬ್‌ಕ್ಯುಟೇನಿಯಸ್ ಫ್ಯಾಟ್” ಎಂದು ಕರೆಯುತ್ತಾರೆ. ಇದನ್ನು ನಾವು ಕೈಯಲ್ಲಿ ಹಿಡಿದು ಎಳೆಯಬಹುದು. ಇದು ನೋಡಲು ಕೆಟ್ಟದಾಗಿ ಕಾಣಬಹುದು, ಆದರೆ ಪ್ರಾಣಕ್ಕೆ ಅಷ್ಟೊಂದು ಅಪಾಯಕಾರಿ ಅಲ್ಲ. ಜೊತೆಗೆ ಈ ಫ್ಯಾಟ್ ಸೆಲ್‌ಗಳು ಒಂದು ರೀತಿಯ ಹಾರ್ಮೋನ್ ಕಾರ್ಖಾನೆಗಳ ಹಾಗೆಯೂ ಕೆಲಸ ಮಾಡುತ್ತವೆ. ಲೆಪ್ಟಿನ್, ಅಡಿಪೋನೆಕ್ಟಿನ್ ಎಂಬ ಹಾರ್ಮೋನ್‌ಗಳನ್ನು ಬಿಡುಗಡೆ ಮಾಡಿ ನಮ್ಮ ಹಸಿವು, ಮೆಟಬಾಲಿಸಂ ಮತ್ತು ರೋಗನಿರೋಧಕ ಶಕ್ತಿಯನ್ನು ಸಮತೋಲನಗೊಳಿಸುತ್ತದೆ.

ವಿಸರಲ್ ಫ್ಯಾಟ್: ಅತ್ಯಂತ ಅಪಾಯಕಾರಿ

ಇನ್ನೊಂದು ಫ್ಯಾಟ್ ಇದೆ – ಇದೇ ವಿಸರಲ್ ಫ್ಯಾಟ್. ಇದು ಕಣ್ಣಿಗೆ ಕಾಣುವುದಿಲ್ಲ. ನಮ್ಮ ಹೊಟ್ಟೆಯ ಒಳಗೆ ಲಿವರ್, ಹೃದಯ, ಪ್ಯಾಂಕ್ರಿಯಾಸ್, ಕಿಡ್ನಿಗಳ ಸುತ್ತ ಶೇಖರಣೆಯಾಗುವ ಬೊಜ್ಜು ಇದು. ಇದು ಅತ್ಯಂತ ಅಪಾಯಕಾರಿ. ಏಕೆಂದರೆ ಈ ವಿಸರಲ್ ಫ್ಯಾಟ್ ಸುಮ್ಮನೆ ಕೂರುವುದಿಲ್ಲ. ಇದು ಸೈಟೋಕೈನ್ಸ್ ಎಂಬ ವಿಷಕಾರಿ ರಾಸಾಯನಿಕಗಳನ್ನು ಬಿಡುಗಡೆ ಮಾಡಲು ಆರಂಭಿಸುತ್ತದೆ. ಇದರಿಂದ ದೇಹದಲ್ಲಿ ಇನ್ಫ್ಲಮೇಷನ್ (ಉರಿಯೂತ) ಶುರುವಾಗುತ್ತದೆ. ಈ ಒಳಗಿನ ಫ್ಯಾಟ್‌ನಿಂದಲೇ ನಮಗೆ ಬಿಪಿ, ಶುಗರ್, ಇನ್ಸುಲಿನ್ ರೆಸಿಸ್ಟೆನ್ಸ್, ಫ್ಯಾಟಿ ಲಿವರ್ ಆರಂಭವಾಗುತ್ತದೆ. ಇದೇ ಮುಂದೆ ಹೋಗಿ ಟೈಪ್ 2 ಡಯಾಬಿಟೀಸ್ ಮತ್ತು ಹಾರ್ಟ್ ಅಟ್ಯಾಕ್‌ಗೆ ನೇರವಾದ ಕಾರಣವೂ ಆಗುತ್ತದೆ. ಅದಕ್ಕಾಗಿಯೇ ಈ ವಿಸರಲ್ ಫ್ಯಾಟ್ ಅನ್ನು ವೈದ್ಯಕೀಯ ಪರಿಭಾಷೆಯಲ್ಲಿ “ಸೈಲೆಂಟ್ ಕಿಲ್ಲರ್” ಎಂದೇ ಕರೆಯುತ್ತಾರೆ.

ಸ್ಕಿನ್ನಿ ಫ್ಯಾಟ್ ಎಂಬ ಭ್ರಮೆ: ಟಾಫಿ ಕಾನ್ಸೆಪ್ಟ್

ಇಲ್ಲಿ ನಾವು ಇನ್ನೊಂದು ದೊಡ್ಡ ಭ್ರಮೆಯನ್ನು ಒಡೆಯಲೇಬೇಕು. ಅದೇ “ಸ್ಕಿನ್ನಿ ಫ್ಯಾಟ್”. ಕೆಲವರು “ನಾನು ತುಂಬಾ ಸಣ್ಣಗಿದ್ದೇನೆ, ನನಗೇನೂ ಸಮಸ್ಯೆ ಆಗುವುದಿಲ್ಲ” ಎಂದು ಅಂದುಕೊಳ್ಳುತ್ತಾರೆ. ಆದರೆ ಫ್ಯಾಟ್ ವಿಚಾರದಲ್ಲಿ “TOFI” ಎಂಬ ಪರಿಕಲ್ಪನೆ ಇದೆ. TOFI ಅಂದರೆ Thin Outside Fat Inside – ಹೊರಗಡೆ ಸಣ್ಣಗೆ, ಒಳಗಡೆ ಫ್ಯಾಟ್. ಹೊರಗಡೆ ನೋಡಲು ಇವರು ಸಣ್ಣಗೆ ಕಾಣಿಸುತ್ತಾರೆ, ತೂಕವೂ ಸಾಮಾನ್ಯವಾಗಿ ಇರುತ್ತದೆ. ಆದರೆ ಇವರ ಹೊಟ್ಟೆಯ ಒಳಭಾಗದಲ್ಲಿ ವಿಸರಲ್ ಫ್ಯಾಟ್ ಈ ಪ್ರಮುಖ ಅಂಗಗಳ ಸುತ್ತ ತುಂಬಿಕೊಂಡಿರುತ್ತದೆ. ನೋಡಲು ಫಿಟ್ ಆಗಿ ಇರುವವರಿಗೂ ಸೈಲೆಂಟ್ ಆಗಿ ಹಾರ್ಟ್ ಅಟ್ಯಾಕ್ ಆಗುವುದಕ್ಕೆ ಇದು ಮುಖ್ಯ ಕಾರಣ.

ICMR (ಇಂಡಿಯನ್ ಕೌನ್ಸಿಲ್ ಆಫ್ ಮೆಡಿಕಲ್ ರಿಸರ್ಚ್) ನಡೆಸಿದ ಅಧ್ಯಯನದ ಪ್ರಕಾರ, ಭಾರತದಲ್ಲಿ ಶೇಕಡಾ 43.3ರಷ್ಟು ವಯಸ್ಕರು ಈ ವರ್ಗಕ್ಕೆ ಸೇರುತ್ತಾರೆ. ಇದೊಂದು ದೊಡ್ಡ ಪ್ರಮಾಣ ಎಂದೇ ಅಂದುಕೊಳ್ಳಿ – ಅರ್ಧಕ್ಕರ್ಧ ವಯಸ್ಕರು ಎಂದೇ ಅಂದುಕೊಳ್ಳಿ. ಅಂದರೆ ಇವರು ದಪ್ಪ ಇಲ್ಲದೆ ಇದ್ದರೂ ಸಹ ಒಳಗಡೆ ಚಯಾಪಚಯಿಕವಾಗಿ ಬೊಜ್ಜು (metabolically obese) ಹೊಂದಿದ್ದಾರೆ. ಇವರಿಗೆ ಕಿಡ್ನಿ ಫೇಲ್ಯೂರ್, ಡಯಾಬಿಟೀಸ್ ಮತ್ತು ಹಾರ್ಟ್ ಅಟ್ಯಾಕ್ ಆಗುವ ಅಪಾಯ ಹೆಚ್ಚಾಗಿ ಬರುತ್ತಿದೆ.

ಇಲ್ಲಿ ವಾಸ್ತವಾಂಶ ಏನೆಂದರೆ – ಫ್ಯಾಟ್ ನಮ್ಮ ಶತ್ರುವಲ್ಲ. ಒಂದು ಹಂತದ ಫ್ಯಾಟ್ ನಮ್ಮ ದೇಹಕ್ಕೆ ರಕ್ಷಣೆ ಕೊಡುತ್ತದೆ. ಮಿತಿಮೀರಿದಾಗ, ಅಂದರೆ ಶೇಖರಣೆ ಆಗಬಾರದಾಗಿರುವ ಜಾಗದಲ್ಲಿ ಶೇಖರಣೆ ಆದಾಗ, ಆಗ ನಮ್ಮ ದೇಹಕ್ಕೆ ಅದು ಶತ್ರುವಾಗುತ್ತದೆ.

ಡಯಟ್ ಟ್ರ್ಯಾಪ್: ಫ್ಯಾಟ್ ಕರಗಿಸುವ ಬಗ್ಗೆ ತಪ್ಪು ಕಲ್ಪನೆಗಳು

ಈಗ ಈ ಲೇಖನದ ಮುಖ್ಯ ಅಂಶಕ್ಕೆ ಬರೋಣ. ಫ್ಯಾಟ್ ಕರಗಿಸುವ ವಿಚಾರದಲ್ಲಿ ಜನರಿಗೆ ತುಂಬಾನೇ ತಪ್ಪು ಕಲ್ಪನೆಗಳಿವೆ.

ಬೆವರುವಿಕೆ ಮತ್ತು ಫ್ಯಾಟ್ ಕರಗುವಿಕೆ ಒಂದಲ್ಲ

ನಮ್ಮ ಜನರ ನಂಬಿಕೆ ಏನೆಂದರೆ – ಜಿಮ್‌ನಲ್ಲಿ ಎಷ್ಟು ಬೆವರುತ್ತೀರೋ ಅಷ್ಟು ಫ್ಯಾಟ್ ಕರಗುತ್ತದೆ ಎಂದು. ಕೆಲವರು ಬೆವರಲಿ ಎಂದೇ ಸ್ವೆಟರ್ ಹಾಕಿಕೊಂಡು, ಪ್ಲಾಸ್ಟಿಕ್ ಸುತ್ತಿಕೊಂಡು ವಾಕಿಂಗ್ ಮಾಡುತ್ತಾರೆ. ಆದರೆ ಬೆವರುವಿಕೆಗೂ ಫ್ಯಾಟ್ ಕರಗುವುದಕ್ಕೂ ಯಾವುದೇ ಸಂಬಂಧವೇ ಇಲ್ಲ. ಟಿವಿಯಲ್ಲಿ ತೋರಿಸುವ ಸ್ವೆಟ್ ಬೆಲ್ಟ್, ಸ್ಲಿಮ್ಮಿಂಗ್ ಟೀ, ಫ್ಯಾಟ್ ಬರ್ನರ್ ಮಾತ್ರೆಗಳು – ಇವೆಲ್ಲ ವ್ಯಾಪಾರ ಅಷ್ಟೇ. ಬೆಲ್ಟ್ ಹಾಕಿಕೊಂಡಾಗ ಬರುವ ಬೆವರಿನಿಂದ ನಮ್ಮ ದೇಹದ ನೀರು ಕಡಿಮೆಯಾಗುತ್ತದೆ, ಆವಿಯಾಗುತ್ತದೆ. ಫ್ಯಾಟ್ ಅದರಿಂದ ಕರಗುವುದಿಲ್ಲ, ಬೆವರಿನಿಂದ ಹೋಗುವುದಿಲ್ಲ. ಮಾತ್ರೆಗಳಿಂದ ದೇಹಕ್ಕೆ ಹಾನಿಯಾಗುವ ಸಾಧ್ಯತೆಗಳಿವೆ.

ಬರ್ನ್ ಮಾಡಿದ ಫ್ಯಾಟ್ ಎಲ್ಲಿಗೆ ಹೋಗುತ್ತದೆ?

ಹಾಗಿದ್ದರೆ ನಾವು ಬರ್ನ್ ಮಾಡಿದ ಫ್ಯಾಟ್ ಎಲ್ಲಿಗೆ ಹೋಗುತ್ತದೆ? ವೈದ್ಯಕೀಯ ವಿಜ್ಞಾನದ ಪ್ರಕಾರ ಫ್ಯಾಟ್ ಕರಗಿದಾಗ ಅದು ಕಾರ್ಬನ್ ಡೈಆಕ್ಸೈಡ್ ಮತ್ತು ನೀರಾಗಿ ಪರಿವರ್ತನೆಗೊಳ್ಳುತ್ತದೆ. ಮತ್ತು ಅದು ಹೊರಗೆ ಹೋಗುವುದು ನಮ್ಮ ಉಸಿರಾಟದ ಮೂಲಕ!

ಲೆಕ್ಕ ಕೇಳಿ – ನೀವು 10 ಕೆಜಿ ಫ್ಯಾಟ್ ಕರಗಿಸಿದರೆ, ಅದರಲ್ಲಿ 8.4 ಕೆಜಿ ಫ್ಯಾಟ್ ನಿಮ್ಮ ಉಸಿರಿನ ಮೂಲಕ ನೀವು ಹೊರ ಹಾಕುವ ಗಾಳಿಯಲ್ಲಿ ಕಾರ್ಬನ್ ಡೈಆಕ್ಸೈಡ್ ಆಗಿ ಹೊರ ಹೋಗುತ್ತದೆ. ನಿಮ್ಮ ಕಾರಿನಲ್ಲಿ, ಬೈಕ್‌ನಲ್ಲಿ ಪೆಟ್ರೋಲ್-ಡೀಸೆಲ್ ಅನ್ನು ನೀವು ಸುಟ್ಟಾಗ ಆ ಇಂಧನ ಸುಟ್ಟು ಕಾರ್ಬನ್ ಡೈಆಕ್ಸೈಡ್ ಹೊರಗೆ ಬರುತ್ತದಲ್ಲ, ಅದೇ ರೀತಿ ನಿಮ್ಮ ದೇಹದಲ್ಲಿ ನೀವು ಚರ್ಬಿ ಸುಟ್ಟಾಗಲೂ ಕಾರ್ಬನ್ ಡೈಆಕ್ಸೈಡ್ ಆಗಿ, ಗೊತ್ತಾಗದಂತೆ ಹೊರಗೆ ಹೋಗುತ್ತದೆ. ಉಳಿದ ಕೇವಲ 1.6 ಕೆಜಿ ಮಾತ್ರ ನೀರಾಗಿ ಬೆವರು ಮತ್ತು ಮೂತ್ರದ ಮೂಲಕ ಹೊರ ಹೋಗುತ್ತದೆ.

ಇದೊಂದು ಆಶ್ಚರ್ಯಕರ ಸಂಗತಿ ಅಲ್ಲವೇ? ನೀವು ಫ್ಯಾಟ್ ಕರಗಿಸಿದಾಗ, ಅದು ಬೆವರಿನ ಮೂಲಕ ಹೆಚ್ಚಾಗಿ ಹೊರಹೋಗುತ್ತದೆ ಎಂದು ನಂಬಿದ್ದ ಬಹುಪಾಲು ಜನರಿಗೆ ಇದೊಂದು ಹೊಸ ಮಾಹಿತಿ. ಉಸಿರಾಟ ಎಂಬುದೇ ನಮ್ಮ ದೇಹದ ಪ್ರಮುಖ “ಫ್ಯಾಟ್ ಡಿಸ್ಪೋಸಲ್ ಸಿಸ್ಟಮ್” ಎಂಬುದನ್ನು ಅರ್ಥ ಮಾಡಿಕೊಂಡರೆ, ಆಳವಾದ ಉಸಿರಾಟ, ಕಾರ್ಡಿಯೋ ವ್ಯಾಯಾಮಗಳ ಮಹತ್ವ ಇನ್ನಷ್ಟು ಸ್ಪಷ್ಟವಾಗುತ್ತದೆ.

ಕ್ರ್ಯಾಶ್ ಡಯಟ್ ಎಂಬ ಅಪಾಯಕಾರಿ ತಪ್ಪು

ಬೊಜ್ಜು ಕರಗಿಸಬೇಕು ಎಂದ ತಕ್ಷಣ ನಮ್ಮ ಜನ ಮಾಡುವ ದೊಡ್ಡ ತಪ್ಪು ಎಂದರೆ – ಊಟ ಬಿಡುವುದು, ಅಂದರೆ ಕ್ರ್ಯಾಶ್ ಡಯಟ್ ಮಾಡುವುದು. ಒಮ್ಮೆಗೇ ಊಟ ಬಿಟ್ಟರೆ ತೂಕ ಖಂಡಿತ ಇಳಿಯುತ್ತದೆ, ಆದರೆ ಅದು ಕೇವಲ ಫ್ಯಾಟ್ ಮಾತ್ರ ಅಲ್ಲ – ಬದಲಿಗೆ ನಿಮ್ಮ ಮಾಂಸಖಂಡಗಳು (ಮಸಲ್) ಕೂಡ ಕರಗುತ್ತಾ ಹೋಗುತ್ತವೆ.

ದೇಹಕ್ಕೆ ಆಹಾರ ಸಿಗದಿದ್ದಾಗ ಅದು ತುರ್ತು ಸ್ಥಿತಿಗೆ (Emergency Mode) ಹೋಗಿ “ಅಡಾಪ್ಟಿವ್ ಥರ್ಮೋಜೆನೆಸಿಸ್” ಎಂಬ ಪ್ರಕ್ರಿಯೆಯನ್ನು ಆರಂಭಿಸುತ್ತದೆ. ಆಗ ಕೇವಲ ಫ್ಯಾಟ್ ಮಾತ್ರ ಅಲ್ಲ, ಜೀವ ಉಳಿಸಿಕೊಳ್ಳಲು ನಿಮ್ಮ ಮಸಲ್‌ಗಳನ್ನೂ ಕರಗಿಸಿ ಶಕ್ತಿ ಪಡೆದುಕೊಳ್ಳುತ್ತದೆ.

ಸ್ಪಾಟ್ ರಿಡಕ್ಷನ್: ಇನ್ನೊಂದು ಬೃಹತ್ ಸುಳ್ಳು

ಜೊತೆಗೆ ಇನ್ನೊಂದು ಅತಿ ದೊಡ್ಡ ಸುಳ್ಳು ಎಂದರೆ “ಸ್ಪಾಟ್ ರಿಡಕ್ಷನ್”. ತುಂಬಾ ಜಿಮ್‌ಗಳಲ್ಲಿ “ಬರೀ ಹೊಟ್ಟೆ ಕರಗಿಸುತ್ತೇನೆ”, “ಬರೀ ತೊಡೆ ಸಣ್ಣ ಮಾಡುತ್ತೇನೆ” ಎಂದು ಹೇಳಿ ಪ್ರಯತ್ನಪಡುತ್ತಿರುತ್ತಾರೆ. ಇದೂ ಸಹ ಸಂಪೂರ್ಣ ಸುಳ್ಳು. ವಿಜ್ಞಾನದ ಪ್ರಕಾರ ಹಾಗೆ ಮಾಡುವುದು ಸಾಧ್ಯವೇ ಇಲ್ಲ. ನೀವು ಎಷ್ಟೇ ನೂರಾರು ಸಿಟ್‌ಅಪ್‌ಗಳನ್ನು ಮಾಡಿದರೂ, ಅಲ್ಲಿರುವ ಮಸಲ್ ಬಲಶಾಲಿಯಾಗುತ್ತದೆ ಹೊರತು ಫ್ಯಾಟ್ ಆ ಜಾಗದಲ್ಲಿ ಮಾತ್ರ ಕರಗುವುದಿಲ್ಲ.

ಎಷ್ಟೇ ಆಬ್ಸ್ ವರ್ಕ್‌ಔಟ್ ಮಾಡಿದರೂ, ನೇರವಾಗಿ ಅಲ್ಲಿರುವ ಫ್ಯಾಟ್ ಮಾತ್ರ ಕರಗುವುದಿಲ್ಲ. ದೇಹದಾದ್ಯಂತ ಫ್ಯಾಟ್ ಕಡಿಮೆಯಾದರೆ, ಸಂಪೂರ್ಣ ದೇಹದಲ್ಲಿ ಕ್ರಮೇಣ ಕಡಿಮೆಯಾಗುತ್ತಾ ಹೋಗಿ, ಅಲ್ಲಿಯೂ ಕಡಿಮೆಯಾಗುತ್ತದೆ. ಅಲ್ಲಿ ಮಾತ್ರ ಸ್ಪಾಟ್ ಬರ್ನ್ ಮಾಡಿ, ಆ ಜಾಗಕ್ಕೆ ಮಾತ್ರ ವರ್ಕೌಟ್ ಮಾಡಿ, ಆ ಜಾಗದ ಫ್ಯಾಟ್ ಬರ್ನ್ ಮಾಡಲು ಸಾಧ್ಯವಿಲ್ಲ.

ವಾಸ್ತವವಾಗಿ, ಆ ಭಾಗದಲ್ಲಿ ಈಗಾಗಲೇ ಬೊಜ್ಜು ಇದ್ದರೆ, ಬರೀ ಹೊಟ್ಟೆಗೆ ಮಾತ್ರ ವರ್ಕೌಟ್ ಮಾಡುತ್ತೇನೆ ಎಂದರೆ, ಆ ಫ್ಯಾಟ್ ಲೇಯರ್‌ನ ಕೆಳಗಡೆ ಇರುವ ಮಸಲ್ ದಪ್ಪವಾಗಿ, ಇನ್ನೂ ದಪ್ಪವಾಗಿ ಕಾಣಬಹುದು ಅಷ್ಟೇ. ಅದು ವಿಜ್ಞಾನ ಹೇಳುವ ವಾಸ್ತವ.

ಆದ್ದರಿಂದ ಫ್ಯಾಟ್ ಕರಗಬೇಕು ಎಂದರೆ ಇಡೀ ದೇಹದಲ್ಲಿ ಎನರ್ಜಿ ಡೆಫಿಸಿಟ್, ಕ್ಯಾಲೋರಿ ಡೆಫಿಸಿಟ್ ಆಗಲೇಬೇಕು. ಅಂದರೆ ನಾವು ತಿನ್ನುವ ಶಕ್ತಿಗಿಂತ ಖರ್ಚು ಮಾಡುವ ಶಕ್ತಿ ಜಾಸ್ತಿ ಇರಬೇಕು. ಆಗ ನಮ್ಮ ದೇಹಕ್ಕೆ ಶಕ್ತಿ ಬೇಕಾದಾಗ, ಅದಾಗಲೇ ಸಂಗ್ರಹವಾಗಿರುವ ಫ್ಯಾಟ್ ಅನ್ನು ಒಡೆದು, ಶಕ್ತಿಯಾಗಿ ಬಳಸಿಕೊಳ್ಳುತ್ತದೆ. ಇದನ್ನು ವೈದ್ಯಕೀಯ ಪರಿಭಾಷೆಯಲ್ಲಿ “ಲೈಪೋಲಿಸಿಸ್” ಎಂದು ಕರೆಯುತ್ತಾರೆ. ಈ ಪ್ರಕ್ರಿಯೆ ನಡೆದಾಗ ಮಾತ್ರ ಫ್ಯಾಟ್ ಸೆಲ್‌ಗಳು ಸಂಕುಚಿತಗೊಂಡು (shrink) ನಾವು ಸಣ್ಣಗಾಗುತ್ತೇವೆ. ಆಗ ಇಡೀ ದೇಹದಿಂದ ಒಟ್ಟಾರೆಯಾಗಿ ಫ್ಯಾಟ್ ಕರಗುತ್ತಾ ಬರುತ್ತದೆ.

ಫ್ಯಾಟ್ ಸಂಗ್ರಹಣೆಯ ಎರಡು ಖಳನಾಯಕರು

ಇಲ್ಲಿ ನೀವು ಅರ್ಥ ಮಾಡಿಕೊಳ್ಳಬೇಕಾದ ಇಬ್ಬರು ಖಳನಾಯಕರಿದ್ದಾರೆ.

ಒಂದು: ಇನ್ಸುಲಿನ್

ಒಬ್ಬ – ಇನ್ಸುಲಿನ್. ಇದನ್ನು ಸರಳವಾಗಿ “ಫ್ಯಾಟ್ ಸ್ಟೋರೇಜ್ ಹಾರ್ಮೋನ್” ಎಂದು ಹೇಳಬಹುದು. ನಾವು ಹೆಚ್ಚು ಸಕ್ಕರೆ, ರಿಫೈಂಡ್ ಕಾರ್ಬ್ಸ್ ತಿಂದಾಗ ಇನ್ಸುಲಿನ್ ಹೆಚ್ಚಾಗುತ್ತದೆ. ಆಗ ಅದು ಫ್ಯಾಟ್ ಅನ್ನು ಲಾಕ್ ಮಾಡಿ, “ಕರಗಿಸಬೇಡ” ಎಂದು ದೇಹಕ್ಕೆ ಆದೇಶ ಕೊಡುತ್ತದೆ.

ಎರಡು: ಕಾರ್ಟಿಸೋಲ್

ಇನ್ನೊಬ್ಬ ಖಳನಾಯಕ – ಕಾರ್ಟಿಸೋಲ್. ಇದು ಒತ್ತಡದ ಹಾರ್ಮೋನ್ (Stress Hormone). ನಿದ್ದೆ ಕೆಟ್ಟಾಗ, ತುಂಬಾ ಒತ್ತಡ ಪಟ್ಟುಕೊಂಡಾಗ ಈ ಹಾರ್ಮೋನ್ ಬಿಡುಗಡೆಯಾಗುತ್ತದೆ. ಇದು ನೇರವಾಗಿ ನಮ್ಮ ಹೊಟ್ಟೆಯ ಸುತ್ತ ವಿಸರಲ್ ಫ್ಯಾಟ್ ಅನ್ನು ಶೇಖರಣೆ ಮಾಡುತ್ತದೆ. ದಿನಕ್ಕೆ ಏಳೆಂಟು ಗಂಟೆ ಸರಿಯಾಗಿ ನಿದ್ದೆ ಮಾಡದವರ ತೂಕ, ಎಷ್ಟೇ ಕಷ್ಟಪಟ್ಟರೂ ಇದೇ ಕಾರಣಕ್ಕೆ ಇಳಿಯುವುದಿಲ್ಲ.

ಈ ಎರಡು ಹಾರ್ಮೋನ್‌ಗಳ ಪಾತ್ರ ಅರ್ಥವಾದರೆ, ಕೇವಲ ಆಹಾರ ಮತ್ತು ವ್ಯಾಯಾಮ ಮಾತ್ರ ಫ್ಯಾಟ್ ಕರಗಿಸುವಿಕೆಗೆ ಸಾಕಾಗುವುದಿಲ್ಲ ಎಂಬುದು ಸ್ಪಷ್ಟವಾಗುತ್ತದೆ. ನಿದ್ದೆ ಮತ್ತು ಮಾನಸಿಕ ಶಾಂತಿಯೂ ಅಷ್ಟೇ ಮುಖ್ಯ ಪಾತ್ರ ವಹಿಸುತ್ತವೆ.

ಫ್ಯಾಟ್ ಕರಗಿಸುವ ಬ್ರಹ್ಮಾಸ್ತ್ರ: ಮಸಲ್ ಎಂಬ ಮ್ಯಾಜಿಕ್

ಸುಮ್ಮನೆ ಊಟ ಬಿಟ್ಟುಕೊಂಡು ಕುಳಿತುಕೊಂಡರೆ ಮಸಲ್ ಕರಗುತ್ತದೆಯೇ ಹೊರತು, ಫ್ಯಾಟ್ ಮಾತ್ರ ಅಲ್ಲ, ಮಸಲ್ ಕೂಡ ಹೀಗೆ ಕರಗುತ್ತದೆ. ಆದರೆ ಫ್ಯಾಟ್ ಕರಗಬೇಕು ಎಂದರೆ ಕ್ಯಾಲೋರಿ ಡೆಫಿಸಿಟ್ ಆಗಲೇಬೇಕು. ಹೇಗೆ ಮಾಡುವುದು? ಶಕ್ತಿ – ದೇಹ ಬಳಸುವುದಕ್ಕಿಂತ ಸ್ವಲ್ಪ ಕಡಿಮೆ ತಿನ್ನಬೇಕು, ಡೆಫಿಸಿಟ್ ಮಾಡಬೇಕು ಎಂದು ಹೇಳಿದರೆ, ಮತ್ತೆ ಹೇಗೆ ಮಾಡುವುದು ಎಂಬ ಪ್ರಶ್ನೆಯನ್ನು ತುಂಬಾ ಜನ ಕೇಳಬಹುದು. ಈಗ ಇದಕ್ಕೆ ಪರಿಹಾರ ಏನು, ಫ್ಯಾಟ್ ಲಾಸ್ ಮಾಡುವುದು ಹೇಗೆ ಎಂಬುದನ್ನು ವಿವರವಾಗಿ ನೋಡೋಣ.

ಕೇವಲ ಕಾರ್ಡಿಯೋ, ಜಾಗಿಂಗ್ ಅಥವಾ ವಾಕಿಂಗ್ ಮಾಡಿದರೆ ಸಾಕಾಗುವುದಿಲ್ಲ. ನಿಮಗೆ ದೀರ್ಘಕಾಲೀನ ಫಲಿತಾಂಶ ಬೇಕು ಎಂದರೆ, ಸ್ಟ್ರೆಂಥ್ ಟ್ರೈನಿಂಗ್ – ಮಸಲ್ ಬಿಲ್ಡ್ ಮಾಡುವುದು ಅತಿ ಮುಖ್ಯ. ಮಸಲ್ ಹೆಲ್ದಿಯಾಗಿ, ಸಲ್ಮಾನ್ ಖಾನ್ ಥರ ದೊಡ್ಡ ದೊಡ್ಡ ಆಗಬೇಕು ಎಂದೇನೂ ಇಲ್ಲ. ವಿರಾಟ್ ಕೊಹ್ಲಿ ಥರ ಯಾವುದೇ ಕ್ರೀಡಾಪಟುವನ್ನು ತೆಗೆದುಕೊಳ್ಳಿ – ಅಥ್ಲೆಟಿಕ್ ಬಾಡಿ ಇರುತ್ತದಲ್ಲ, ಅಷ್ಟಾದರೂ ಆರೋಗ್ಯಕರ ಮಸಲ್‌ಗಳನ್ನು ಕಾಪಾಡಿಕೊಳ್ಳಬೇಕು.

ಸರಳವಾಗಿ ವಿವರಿಸುತ್ತೇವೆ ಕೇಳಿ – ನಿಮ್ಮ ದೇಹದಲ್ಲಿ ಮಸಲ್ ಕಡಿಮೆ ಇದ್ದರೆ, ಅದು ಮಾರುತಿ 800 ಕಾರಿನ ಇಂಜಿನ್ ಥರ. ಅದು ಪೆಟ್ರೋಲ್ ಕಡಿಮೆ ಕುಡಿಯುತ್ತದೆ. ಆದರೆ ನೀವು ಮಸಲ್ ಬಿಲ್ಡ್ ಮಾಡಲು ದೇಹಕ್ಕೆ ಕೆಲಸ ಕೊಟ್ಟರೆ, ನಿಮ್ಮ ದೇಹದ ಇಂಜಿನ್ ಫಾರ್ಚುನರ್ ಕಾರಿನ ಇಂಜಿನ್ ಥರ ಆಗುತ್ತದೆ. ಆಗ ನಿಮ್ಮ ಬೇಸಲ್ ಮೆಟಬಾಲಿಕ್ ರೇಟ್ (BMR) ಹೆಚ್ಚಾಗುತ್ತದೆ. ಅಂದರೆ ನೀವು ಸುಮ್ಮನೆ ಕುಳಿತಿದ್ದಾಗಲೂ, ನಿದ್ದೆ ಮಾಡುತ್ತಿದ್ದಾಗಲೂ ನಿಮ್ಮ ದೇಹದ ಈ ದೊಡ್ಡ ಇಂಜಿನ್ ಫ್ಯಾಟ್ ಅನ್ನು ಬರ್ನ್ ಮಾಡುತ್ತಲೇ ಇರುತ್ತದೆ.

ಪ್ರೋಟೀನ್‌ನ ಪ್ರಾಮುಖ್ಯತೆ

ಹಾಗಂತ ಸರಿಯಾಗಿ ವರ್ಕೌಟ್ ಮಾಡಿ ಬಂದು ಮಲಗಿದ ತಕ್ಷಣ ಫ್ಯಾಟ್ ಬರ್ನ್ ಆಗಿ, ಮಸಲ್ ಬಿಲ್ಡ್ ಆಗಿಬಿಡುತ್ತದೆ ಎಂದಲ್ಲ. ಫ್ಯಾಟ್ ಬರ್ನ್ ಆಗುತ್ತದೆ, ಆದರೆ ಸರಿಯಾದ ಪೌಷ್ಟಿಕಾಂಶ ಕೊಡದಿದ್ದರೆ ಮಸಲ್ ಕೂಡ ಕರಗಿ ಹೋಗುತ್ತದೆ. ಸರಿಯಾಗಿ ಪೌಷ್ಟಿಕಾಂಶ ಕೊಟ್ಟು, ಚೆನ್ನಾಗಿ ಎಕ್ಸರ್ಸೈಸ್ ಮಾಡಿದರೆ ಮಾತ್ರ ಫಲಿತಾಂಶ ಸಿಗುತ್ತದೆ. (ಇದನ್ನು ಯಾವಾಗಲೂ ನಿಮ್ಮ ವೈದ್ಯರು ಮತ್ತು ಫಿಟ್‌ನೆಸ್ ಸಲಹೆಗಾರರು, ಡಯಟಿಷಿಯನ್ ಸಲಹೆ ಪಡೆದೇ ಮಾಡಬೇಕು – ಇದು ಸಾಮಾನ್ಯ ಮಾಹಿತಿ ಅಷ್ಟೇ.)

ಬರೀ ವರ್ಕೌಟ್ ಮಾಡಿ ಬಂದು ಮನೆಯಲ್ಲಿ ಮಲಗಿದ ತಕ್ಷಣ ಮಸಲ್ ಬೆಳೆಯುವುದಿಲ್ಲ. ಒಂದು ವಾರದಲ್ಲಿ ಸ್ವಲ್ಪ ಗಟ್ಟಿಯಾಗಿ ಕಾಣಬಹುದು ಅಷ್ಟೇ. ನಿಮಗೆ ಸೂಕ್ತವಾದ, ಆರೋಗ್ಯಕರ, ಲೀನ್ ಮಸಲ್‌ಗಳು ಬಿಲ್ಡ್ ಆಗುವುದು ಕಷ್ಟ – ಬರೀ ವರ್ಕೌಟ್ ಮಾಡಿ, ಸರಿಯಾದ ಪೌಷ್ಟಿಕಾಂಶ ಕೊಡದಿದ್ದರೆ ಫ್ಯಾಟ್ ಜೊತೆಗೆ ಮಸಲ್‌ಗಳೂ ಕರಗಿಹೋಗುತ್ತವೆ. ಇಲ್ಲದಿದ್ದರೆ ಪ್ರೋಟೀನ್ ಇಂಟೇಕ್ ಚೆನ್ನಾಗಿರಬೇಕು. ಪ್ರೋಟೀನ್ ಇಂಟೇಕ್ ಚೆನ್ನಾಗಿದ್ದರೆ ಹೊಟ್ಟೆ ಹಸಿವಾಗುವುದಿಲ್ಲ, ಮತ್ತು ಡಯಟ್ ಮಾಡುವಾಗ ನಿಮ್ಮ ಮಸಲ್‌ಗಳು ಕರಗಿಹೋಗದಂತೆ ಅದು ಕಾಪಾಡುತ್ತದೆ.

ಮಸಲ್ ಬಿಲ್ಡ್ ಮಾಡಲು ಬೇಕಾಗಿರುವ ಪೌಷ್ಟಿಕಾಂಶ ಎಂದರೆ ಪ್ರೋಟೀನ್. ಪ್ರೋಟೀನ್ ಎಷ್ಟು ಬೇಕು? ತಜ್ಞರು ಹೇಳುತ್ತಾರೆ, ಅಧ್ಯಯನಗಳು ಹೇಳುತ್ತವೆ – ವರ್ಕೌಟ್ ಮಾಡುವವರಿಗೆ ಪ್ರತಿ ಕೆಜಿ ದೇಹದ ತೂಕಕ್ಕೆ ಕನಿಷ್ಠ ಒಂದೂವರೆ ಗ್ರಾಂ ಪ್ರೋಟೀನ್ ಪ್ರತಿದಿನ ಬೇಕು ಎಂದು ಹೇಳುತ್ತಾರೆ. (ಇದನ್ನೂ ಸಹ ನಿಮ್ಮ ಡಯಟಿಷಿಯನ್ ಬಳಿ ಕೇಳಿಯೇ ನೀವು ಯೋಜಿಸಿಕೊಳ್ಳಬೇಕು.) ಹಾಗೂ ಪ್ರೋಟೀನ್ ಅನ್ನು ಎಲ್ಲಿಂದ ಪಡೆಯಬೇಕು – ನಮ್ಮ ಆಹಾರದಲ್ಲೇ ಸಾಕಷ್ಟು ಪ್ರೋಟೀನ್ ಇದ್ದರೆ ಅದು ಅತ್ಯುತ್ತಮ, ಇಲ್ಲದಿದ್ದರೆ ಪ್ಲಾಂಟ್ ಪ್ರೋಟೀನ್, ವೇ ಪ್ರೋಟೀನ್ ಮುಂತಾದ ಹಲವು ಆಯ್ಕೆಗಳಿವೆ. (ಇದನ್ನೂ ಸಹ ನಿಮ್ಮ ಡಯಟಿಷಿಯನ್ ಬಳಿ ಅಥವಾ ನಿಮ್ಮ ಸ್ವಂತ ಸಂಶೋಧನೆಯ ಮೂಲಕ ನಿರ್ಧರಿಸಿ.)

NEAT: ದೈನಂದಿನ ಚಟುವಟಿಕೆಯ ಶಕ್ತಿ

ಇಲ್ಲಿ ಇನ್ನೊಂದು ಪರಿಕಲ್ಪನೆ ಇದೆ – NEAT ಅಂದರೆ Non-Exercise Activity Thermogenesis. ಜಿಮ್ ಬಿಟ್ಟು, ದಿನಪೂರ್ತಿ ನೀವು ಎಷ್ಟು ಸಕ್ರಿಯರಾಗಿ ಇರುತ್ತೀರಿ ಎಂಬುದು ಇದು. ಲಿಫ್ಟ್ ಬದಲು ಮೆಟ್ಟಿಲು ಹತ್ತುವುದು, ಕುಳಿತುಕೊಳ್ಳುವ ಬದಲು ನಡೆದಾಡುವುದು – ಇವೆಲ್ಲ ಸೇರಿ ದಿನಕ್ಕೆ ನೂರಾರು ಹೆಚ್ಚುವರಿ ಕ್ಯಾಲೋರಿಗಳನ್ನು ಸುಡುತ್ತವೆ.

ಇಂದಿನ ಜೀವನಶೈಲಿಯಲ್ಲಿ ಬಹುತೇಕ ಜನರು ಗಂಟೆಗಟ್ಟಲೆ ಕುಳಿತು ಕೆಲಸ ಮಾಡುತ್ತಾರೆ, ಇದರಿಂದ NEAT ಗಣನೀಯವಾಗಿ ಕಡಿಮೆಯಾಗಿದೆ. ಆದ್ದರಿಂದ ಪ್ರಜ್ಞಾಪೂರ್ವಕವಾಗಿ ಚಲನೆಯನ್ನು ದೈನಂದಿನ ಜೀವನದಲ್ಲಿ ಸೇರಿಸಿಕೊಳ್ಳುವುದು ಬಹಳ ಮುಖ್ಯ. ಪ್ರತಿ ಗಂಟೆಗೆ ಎದ್ದು ಸ್ವಲ್ಪ ನಡೆದಾಡುವುದು, ಫೋನ್‌ನಲ್ಲಿ ಮಾತನಾಡುವಾಗ ನಿಂತು ಅಥವಾ ನಡೆಯುತ್ತಾ ಮಾತನಾಡುವುದು, ಮನೆಗೆಲಸಗಳನ್ನು ಸ್ವತಃ ಮಾಡುವುದು – ಇವೆಲ್ಲ ಸಣ್ಣಪುಟ್ಟ ಬದಲಾವಣೆಗಳು ದೀರ್ಘಕಾಲದಲ್ಲಿ ಗಣನೀಯ ಪರಿಣಾಮ ಬೀರುತ್ತವೆ.

ಹಾರ್ಮೋನ್‌ಗಳ ಪಾತ್ರ: ಒತ್ತಡ ಮತ್ತು ನಿದ್ದೆ

ಜೊತೆಗೆ ಫ್ಯಾಟ್ ಕರಗಿಸಲು ನಮ್ಮ ಹಾರ್ಮೋನ್‌ಗಳೂ ಅಷ್ಟೇ ಮುಖ್ಯ. ನಾವು ಹೆಚ್ಚು ಒತ್ತಡ ತೆಗೆದುಕೊಂಡಾಗ ಅಥವಾ ಸರಿಯಾಗಿ ನಿದ್ದೆ ಮಾಡದೇ ಇದ್ದಾಗ ನಮ್ಮ ದೇಹದಲ್ಲಿ ಕಾರ್ಟಿಸೋಲ್ ಎಂಬ ಒತ್ತಡದ ಹಾರ್ಮೋನ್ ಬಿಡುಗಡೆಯಾಗುತ್ತದೆ. ಈ ಕಾರ್ಟಿಸೋಲ್ ಮಾಡುವ ಮೊದಲ ಕೆಲಸವೇ ನಮ್ಮ ದೇಹದ ಕ್ಯಾಲೋರಿಗಳನ್ನು ಹೊಟ್ಟೆಯ ಭಾಗದಲ್ಲಿ ಫ್ಯಾಟ್ ಆಗಿ ಶೇಖರಣೆ ಮಾಡುವುದು. ಹಾಗಾಗಿ ತೂಕ ಇಳಿಸಬೇಕು ಎನ್ನುವವರಿಗೆ ಒಳ್ಳೆಯ ನಿದ್ದೆ ಮತ್ತು ಒತ್ತಡ-ಮುಕ್ತ ಜೀವನ ಬಹಳ ಮುಖ್ಯ.

ಈ ಅಂಶವನ್ನು ಬಹುತೇಕ ಜನರು ನಿರ್ಲಕ್ಷಿಸುತ್ತಾರೆ. ಜಿಮ್‌ನಲ್ಲಿ ಗಂಟೆಗಟ್ಟಲೆ ಬೆವರು ಸುರಿಸುತ್ತಾರೆ, ಆದರೆ ರಾತ್ರಿ ಸರಿಯಾಗಿ ನಿದ್ದೆ ಮಾಡುವುದಿಲ್ಲ, ಕೆಲಸದ ಒತ್ತಡವನ್ನು ನಿಭಾಯಿಸಲು ಕಲಿಯುವುದಿಲ್ಲ. ಇದರಿಂದ ಎಷ್ಟೇ ಪ್ರಯತ್ನಪಟ್ಟರೂ ಫಲಿತಾಂಶ ಸಿಗುವುದಿಲ್ಲ. ನಿದ್ದೆ ಎಂಬುದು ಕೇವಲ ವಿಶ್ರಾಂತಿಗೆ ಮಾತ್ರವಲ್ಲ, ಅದು ದೇಹದ ಹಾರ್ಮೋನ್ ಸಮತೋಲನಕ್ಕೆ, ಫ್ಯಾಟ್ ಚಯಾಪಚಯಕ್ಕೆ ಅತ್ಯಗತ್ಯ ಪ್ರಕ್ರಿಯೆ.

ಫ್ಯಾಟ್ ಪ್ರಮಾಣ ಪತ್ತೆ ಹಚ್ಚುವುದು ಹೇಗೆ?

ಸ್ನೇಹಿತರೆ, ಫೈನಲಿ ಇಷ್ಟೇ – ಫ್ಯಾಟ್ ನಮ್ಮ ಶತ್ರು ಸಂಪೂರ್ಣವಾಗಿ ಅಲ್ಲ, ಬದಲಿಗೆ ನಮ್ಮದೇ ದೇಹದ ಒಂದು ಭಾಗ, ಒಂದು ರಕ್ಷಣಾ ವ್ಯವಸ್ಥೆ. ಆದರೆ ಅದು ಮಿತಿಮೀರಿದಾಗ ಅಪಾಯಕಾರಿ. ಮಿತಿ ಮೀರಿದೆಯೋ ಇಲ್ಲವೋ ಎಂಬುದನ್ನು ಪತ್ತೆ ಹಚ್ಚುವುದು ಹೇಗೆ? ಮುಟ್ಟಿ ನೋಡಿಕೊಂಡು ಕೂಡ ಗೊತ್ತಾಗುವುದಿಲ್ಲ. ಬ್ಲಡ್ ಟೆಸ್ಟ್ ಮಾಡಿಸಬೇಕು – ನಿಮ್ಮಲ್ಲಿ ಕೊಲೆಸ್ಟ್ರಾಲ್ ಎಷ್ಟಿದೆ ಎಂದು ತಿಳಿಯಬೇಕು. ಹಾಗೆಯೇ ಈಗೆಲ್ಲ DEXA ಸ್ಕ್ಯಾನ್ ರೀತಿಯ ಸ್ಕ್ಯಾನ್‌ಗಳೂ ಬಂದಿವೆ – ದೇಹದಲ್ಲಿ ಫ್ಯಾಟ್ ಪ್ರತಿಶತ ಎಷ್ಟು, ಮಸಲ್ ಎಷ್ಟು ಎಂಬುದನ್ನೆಲ್ಲ ನಿಖರವಾಗಿ ಫಲಿತಾಂಶ ಕೊಡುತ್ತವೆ.

ಇವೆಲ್ಲವನ್ನೂ ಹಿಡಿದುಕೊಂಡು ತಜ್ಞರ ಸಲಹೆ ತೆಗೆದುಕೊಂಡು, ವೈದ್ಯರು, ಡಯಟಿಷಿಯನ್ ಸಲಹೆಯನ್ನು ತೆಗೆದುಕೊಂಡು, ಫಿಟ್‌ನೆಸ್ ಟ್ರೈನರ್ ಮಾರ್ಗದರ್ಶನದಲ್ಲಿ ವ್ಯಾಯಾಮ ಮಾಡಬೇಕು.

“ಇದೆಲ್ಲವನ್ನೂ ನಾನೇ ಮಾಡುತ್ತೇನೆ” ಎಂಬ ಅಪಾಯಕಾರಿ ಧೋರಣೆ

“ಇದೆಲ್ಲವನ್ನೂ ನಾನೇ ಮಾಡುತ್ತೇನೆ, ಯಾರ ಸಹಾಯವೂ ಬೇಡ, ನಾನೇ ನೋಡಿಕೊಂಡು ಮಾಡಿಬಿಡುತ್ತೇನೆ” ಎಂದು ಹೇಳಿದರೆ ಹಣ ಸ್ವಲ್ಪ ಉಳಿಸಬಹುದು, ಆದರೆ ಅಷ್ಟೇ ಅಪಾಯಕಾರಿಯಾಗಿಯೂ ಪರಿಣಮಿಸಬಹುದು. ಏಕೆಂದರೆ ಅದಕ್ಕೆ ಅದರದೇ ಆದ ತಜ್ಞರಿದ್ದಾರೆ. ಅದೊಂದು ವೃತ್ತಿ. ಅವರು ಓದಿ, ತಿಳಿದುಕೊಂಡಿರುತ್ತಾರೆ. ಅದಕ್ಕೆ “ಎಕ್ಸ್‌ಪರ್ಟ್ಸ್” ಎಂದು ಕರೆಸಿಕೊಳ್ಳುತ್ತಾರೆ. ಪ್ರತಿಯೊಬ್ಬ ವ್ಯಕ್ತಿಗೂ ಇದು ಬೇರೆಬೇರೆಯಾಗಿ ಬದಲಾಗುತ್ತದೆ. ಅವರು ಆಯಾ ವ್ಯಕ್ತಿಗೆ ಏನು ಬೇಕೋ ಅದನ್ನು ಸಲಹೆ ಮಾಡುತ್ತಾರೆ. ಆದ್ದರಿಂದ ಇಂಥ ವಿಚಾರಗಳಲ್ಲಿ ತಜ್ಞರ ಸಲಹೆ ಪಡೆದೇ ಮುಂದಿನ ಹೆಜ್ಜೆ ಇಡುವುದು ಸೂಕ್ತ.

ಫಿಟ್‌ನೆಸ್ ಟ್ರೈನರ್‌ಗಳೂ ಸಹ ಪ್ರಮುಖರು. ಪರ್ಸನಲ್ ಟ್ರೈನರ್‌ಗಳಿಗೆ ಜಿಮ್‌ನಲ್ಲಿ ಅನುಭವ ಇಲ್ಲ ಎಂದೆಲ್ಲ ಹೇಳಿ, “ಎಷ್ಟು ಚಾರ್ಜ್ ಮಾಡುತ್ತಾರೆ, ಎಷ್ಟು ದುಡ್ಡು ಕೇಳುತ್ತಾರೆ” ಎಂದೆಲ್ಲ ಯೋಚಿಸುವ ಬದಲು, ಫಲಿತಾಂಶ ಬೇಕು ಎಂದರೆ ಸರ್ಟಿಫೈಡ್ ಟ್ರೈನರ್‌ಗಳ ಸಹಾಯ ಪಡೆಯುವುದೇ ಸೂಕ್ತ. ಅದು ಅವರ ಉದ್ಯೋಗ, ಅದಕ್ಕೆ ಸೂಕ್ತ ಪ್ರತಿಫಲ ಕೊಟ್ಟೇ ತೆಗೆದುಕೊಳ್ಳಬೇಕು. ಒಬ್ಬ ವ್ಯಕ್ತಿ ತಜ್ಞನಾಗಬೇಕಾದರೆ ಒಂದೆರಡು ವರ್ಷಗಳ ಅಧ್ಯಯನ, ಅನುಭವ ಬೇಕಾಗುತ್ತದೆ.

ಫ್ಯಾಟ್ ಉದ್ಯಮ ಮತ್ತು ಮಾರ್ಕೆಟಿಂಗ್ ತಂತ್ರಗಳ ಬಗ್ಗೆ ಎಚ್ಚರಿಕೆ

ಈ ಲೇಖನದ ಆರಂಭದಲ್ಲಿ ನಾವು ನೋಡಿದಂತೆ, 296 ಬಿಲಿಯನ್ ಡಾಲರ್‌ಗಳ ಜಾಗತಿಕ ವೇಟ್ ಲಾಸ್ ಮಾರ್ಕೆಟ್ ಇದೆ. ಈ ಬೃಹತ್ ಉದ್ಯಮ ಜನರ ಭಯ ಮತ್ತು ಅಜ್ಞಾನವನ್ನೇ ಬಂಡವಾಳವಾಗಿಸಿಕೊಂಡು ಬೆಳೆಯುತ್ತಿದೆ. “ಒಂದೇ ವಾರದಲ್ಲಿ 5 ಕೆಜಿ ಇಳಿಸಿ”, “ಈ ಮಾತ್ರೆ ತೆಗೆದುಕೊಂಡರೆ ಸಾಕು, ಫ್ಯಾಟ್ ಕರಗುತ್ತದೆ”, “ಈ ಡಿಟಾಕ್ಸ್ ಟೀ ಕುಡಿದರೆ ಹೊಟ್ಟೆ ಫ್ಲಾಟ್ ಆಗುತ್ತದೆ” ಎಂಬಂಥ ಜಾಹೀರಾತುಗಳು ಜನರನ್ನು ಆಕರ್ಷಿಸುತ್ತಿವೆ. ಆದರೆ ಈ ಲೇಖನದಲ್ಲಿ ನಾವು ಕಂಡುಕೊಂಡಂತೆ, ಫ್ಯಾಟ್ ಕರಗುವುದು ಒಂದು ವೈಜ್ಞಾನಿಕ ಪ್ರಕ್ರಿಯೆ – ಇದಕ್ಕೆ ಯಾವುದೇ ಶಾರ್ಟ್‌ಕಟ್ ಇಲ್ಲ.

ಸಮಗ್ರ ಆರೋಗ್ಯಕರ ವಿಧಾನ – ಸರಿಯಾದ ಪೌಷ್ಟಿಕಾಂಶ, ಸ್ಟ್ರೆಂಥ್ ಟ್ರೈನಿಂಗ್, ಸಾಕಷ್ಟು ನಿದ್ದೆ, ಒತ್ತಡ ನಿರ್ವಹಣೆ ಮತ್ತು ದೀರ್ಘಕಾಲದ ತಾಳ್ಮೆ – ಇವೇ ನಿಜವಾದ ಪರಿಹಾರ. ಯಾವುದೇ ಮಾತ್ರೆ, ಪೌಡರ್ ಅಥವಾ ಬೆಲ್ಟ್ ಈ ಪ್ರಕ್ರಿಯೆಯನ್ನು ಬದಲಾಯಿಸಲಾಗುವುದಿಲ್ಲ.

ಸ್ಪಾಟ್ ರಿಡಕ್ಷನ್ ಬಗ್ಗೆ ಇನ್ನಷ್ಟು ಸ್ಪಷ್ಟತೆ

ಸ್ಪಾಟ್ ರಿಡಕ್ಷನ್ ಎಂಬ ತಪ್ಪು ಕಲ್ಪನೆ ಇನ್ನೂ ಆಳವಾಗಿ ಜನರ ಮನಸ್ಸಿನಲ್ಲಿ ಬೇರೂರಿದೆ. ಇದಕ್ಕೆ ಕಾರಣ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುವ “10 ದಿನಗಳಲ್ಲಿ ಫ್ಲಾಟ್ ಟಮ್ಮಿ” ಎಂಬಂಥ ವೀಡಿಯೋಗಳು. ಆದರೆ ವಿಜ್ಞಾನ ಸ್ಪಷ್ಟವಾಗಿ ಹೇಳುತ್ತದೆ – ದೇಹ ಫ್ಯಾಟ್ ಅನ್ನು ಸಂಗ್ರಹಿಸುವಾಗ ಜೆನೆಟಿಕ್ಸ್ (ಆನುವಂಶಿಕತೆ) ಆಧಾರದ ಮೇಲೆ ಒಂದು ನಿರ್ದಿಷ್ಟ ಮಾದರಿಯಲ್ಲಿ ಸಂಗ್ರಹಿಸುತ್ತದೆ – ಕೆಲವರಿಗೆ ಹೊಟ್ಟೆಯ ಸುತ್ತ, ಕೆಲವರಿಗೆ ತೊಡೆಗಳ ಸುತ್ತ, ಕೆಲವರಿಗೆ ಕೈಗಳ ಸುತ್ತ. ಫ್ಯಾಟ್ ಕರಗುವಾಗಲೂ ಇದೇ ಆನುವಂಶಿಕ ಮಾದರಿಯನ್ನೇ ಅನುಸರಿಸುತ್ತದೆ, ಆದರೆ ನಾವು ಯಾವ ಭಾಗವನ್ನು ಮೊದಲು ಕರಗಿಸಬೇಕು ಎಂದು ಆಯ್ಕೆ ಮಾಡಲು ಸಾಧ್ಯವಿಲ್ಲ.

ಆದ್ದರಿಂದ “ಹೊಟ್ಟೆ ಮಾತ್ರ ಕರಗಿಸುವ ವ್ಯಾಯಾಮ” ಎಂಬಂಥ ಜಾಹೀರಾತುಗಳಿಗೆ ಮರುಳಾಗಬಾರದು. ಬದಲಿಗೆ ಇಡೀ ದೇಹದ ಸಮಗ್ರ ಫಿಟ್‌ನೆಸ್ ಕಾರ್ಯಕ್ರಮವನ್ನು ಅನುಸರಿಸಬೇಕು.

ದೀರ್ಘಕಾಲೀನ ಮನಸ್ಥಿತಿಯ ಮಹತ್ವ

ಫ್ಯಾಟ್ ಲಾಸ್ ಜರ್ನಿಯಲ್ಲಿ ಅತಿ ಮುಖ್ಯವಾದ ಅಂಶ ಎಂದರೆ ತಾಳ್ಮೆ ಮತ್ತು ಸ್ಥಿರತೆ. ಒಂದೇ ವಾರದಲ್ಲಿ, ಒಂದೇ ತಿಂಗಳಲ್ಲಿ ಆಶ್ಚರ್ಯಕರ ಫಲಿತಾಂಶ ನಿರೀಕ್ಷಿಸುವುದು ತಪ್ಪು ನಿರೀಕ್ಷೆ. ಆರೋಗ್ಯಕರ ರೀತಿಯಲ್ಲಿ ವಾರಕ್ಕೆ 0.5 ರಿಂದ 1 ಕೆಜಿ ತೂಕ ಇಳಿಸುವುದೇ ಸೂಕ್ತ ಮಾರ್ಗ ಎಂದು ಆರೋಗ್ಯ ತಜ್ಞರು ಸಾಮಾನ್ಯವಾಗಿ ಸೂಚಿಸುತ್ತಾರೆ. ಇದಕ್ಕಿಂತ ವೇಗವಾಗಿ ತೂಕ ಇಳಿಸಿದರೆ, ಹೆಚ್ಚಾಗಿ ಅದು ಮಸಲ್ ಮತ್ತು ನೀರಿನ ನಷ್ಟವೇ ಆಗಿರುತ್ತದೆ, ಫ್ಯಾಟ್ ಅಲ್ಲ.

ಜೊತೆಗೆ, ಈ ಪ್ರಕ್ರಿಯೆಯನ್ನು ಒಂದು “ಡಯಟ್” ಎಂದು ಅಲ್ಪಾವಧಿಯ ಕಾರ್ಯಕ್ರಮದಂತೆ ನೋಡುವ ಬದಲು, ಇದನ್ನು ಒಂದು ಜೀವನಶೈಲಿಯ ಬದಲಾವಣೆ ಎಂದು ನೋಡುವುದು ಮುಖ್ಯ. ಏಕೆಂದರೆ ಕ್ರ್ಯಾಶ್ ಡಯಟ್‌ಗಳ ಮೂಲಕ ವೇಗವಾಗಿ ತೂಕ ಇಳಿಸಿದವರು, ಡಯಟ್ ನಿಲ್ಲಿಸಿದ ತಕ್ಷಣ ಮತ್ತೆ ತೂಕ ಹೆಚ್ಚಿಸಿಕೊಳ್ಳುವುದು ಸಾಮಾನ್ಯ. ಇದನ್ನು “ಯೋ-ಯೋ ಡಯಟಿಂಗ್” ಎಂದು ಕರೆಯುತ್ತಾರೆ, ಇದು ದೀರ್ಘಕಾಲದಲ್ಲಿ ಚಯಾಪಚಯ ಕ್ರಿಯೆಗೆ ಇನ್ನಷ್ಟು ಹಾನಿ ಮಾಡುತ್ತದೆ.

ಕೊನೆಯ ಮಾತು: ಫ್ಯಾಟ್ ಬಗ್ಗೆ ಸಮತೋಲಿತ ದೃಷ್ಟಿಕೋನ

ಸ್ನೇಹಿತರೆ, ಈಗ ನಿಮಗೆ ಫ್ಯಾಟ್ ಬಗ್ಗೆ ಮತ್ತು ಫ್ಯಾಟ್ ಬರ್ನಿಂಗ್ ಬಗ್ಗೆ ಸಂಪೂರ್ಣ ಸ್ಪಷ್ಟತೆ ಸಿಕ್ಕಿರಬಹುದು. ಫ್ಯಾಟ್ ಎಂಬುದು ನಮ್ಮ ಶತ್ರುವಲ್ಲ – ಅದೊಂದು ಜೀವಂತ ಅಂಗ, ನಮ್ಮ ದೇಹದ ಪ್ರಮುಖ ಭಾಗ. ಮಿತಿಮೀರಿದಾಗ ಮಾತ್ರ ಅದು ಅಪಾಯಕಾರಿಯಾಗುತ್ತದೆ. ಬೆವರುವಿಕೆ ಮತ್ತು ಫ್ಯಾಟ್ ಕರಗುವಿಕೆ ಬೇರೆಬೇರೆ ವಿಷಯಗಳು. ಫ್ಯಾಟ್ ಕರಗಿದಾಗ ಅದು ಮುಖ್ಯವಾಗಿ ಉಸಿರಾಟದ ಮೂಲಕ ಕಾರ್ಬನ್ ಡೈಆಕ್ಸೈಡ್ ಆಗಿ ಹೊರಹೋಗುತ್ತದೆ. ಕ್ರ್ಯಾಶ್ ಡಯಟ್ ಮತ್ತು ಸ್ಪಾಟ್ ರಿಡಕ್ಷನ್ ಎರಡೂ ವೈಜ್ಞಾನಿಕವಾಗಿ ತಪ್ಪಾದ ಪರಿಕಲ್ಪನೆಗಳು.

ಸರಿಯಾದ ಫ್ಯಾಟ್ ಲಾಸ್‌ಗೆ ಬೇಕಾಗಿರುವುದು – ಸ್ಟ್ರೆಂಥ್ ಟ್ರೈನಿಂಗ್ ಮೂಲಕ ಮಸಲ್ ಬಿಲ್ಡ್ ಮಾಡುವುದು, ಸಾಕಷ್ಟು ಪ್ರೋಟೀನ್ ಸೇವನೆ, ದೈನಂದಿನ ಚಟುವಟಿಕೆ ಹೆಚ್ಚಿಸುವುದು, ಸಾಕಷ್ಟು ನಿದ್ದೆ, ಮತ್ತು ಒತ್ತಡ ನಿರ್ವಹಣೆ. ಇವೆಲ್ಲವನ್ನೂ ಸೂಕ್ತ ತಜ್ಞರ ಮಾರ್ಗದರ್ಶನದಲ್ಲಿ ಮಾಡುವುದೇ ಸುರಕ್ಷಿತ ಮತ್ತು ಪರಿಣಾಮಕಾರಿ ಮಾರ್ಗ.

ಫ್ಯಾಟ್ ಬಗ್ಗೆ ಇರುವ ಭಯ ಬಿಟ್ಟು, ವೈಜ್ಞಾನಿಕ ತಿಳುವಳಿಕೆಯೊಂದಿಗೆ, ಸಮತೋಲಿತ ದೃಷ್ಟಿಕೋನದೊಂದಿಗೆ ನಿಮ್ಮ ಆರೋಗ್ಯದ ಪ್ರಯಾಣವನ್ನು ಮುಂದುವರಿಸಿ. ದೇಹದ ಬಗ್ಗೆ ಗೌರವ ಇಟ್ಟುಕೊಂಡು, ಶಾರ್ಟ್‌ಕಟ್‌ಗಳ ಬದಲು ದೀರ್ಘಕಾಲೀನ, ಸುಸ್ಥಿರ ಆರೋಗ್ಯಕರ ಅಭ್ಯಾಸಗಳನ್ನು ಅಳವಡಿಸಿಕೊಳ್ಳಿ. ಇದೇ ನಿಜವಾದ, ಶಾಶ್ವತವಾದ ಫಿಟ್‌ನೆಸ್‌ನ ಮಾರ್ಗ.